كتبت الاعلامية /دعاء سلطان
ركب دكتور تاكسي رايح المحطه الدوليه..
في نص الطريق السواق قالي معلش انت رايح فين يا باشا .. قولتله السوبر جيت .. قالي معلش يا باشا انا لسه اخويا عامل معايا موقف مخليني مش شايف قدامي وقام معيط ..
ومعلي صوت القرآن وقال ياااا رب ازاي يا رب ده اخويا يا رب ..
- استهدي بالله يا ريس مالك بس في ايه
# اخويا طردني من بيته حالا قدام مراته وكل ده علشان عاوز منه 200 جنيه سلف.. بنتي عندها خمس سنين وبراد الشاي وقع عليها واتحرقت ومعييش فلوس اجيب العلاج علشان اقساط التاكسي.
- با باشا ولا يهمك ربنا كريم ومبينساش حد .. اعتبر الموضوع اتحل والبنت هتبقي زي الفل
# يا استاذ والله هاخد رقمك وهرجعهملك بس الحق وش البنت قبل ما تتشوه ده جلد وشها مات وامها قاعده تعيط في البيت مستنياني اجيب العلاج.
- ثانيه واحده هعمل اتصال يسطي " ايوه يا حسن جهزلي حالا اوضه العمليات و الات الجراحه الجديده وهات شاش فازلين و غيار معايا حاله حروق هاجي اشتغلها دلوقتي ___ لا يا حسن مينفعش بكره انا هجيب الحاله وهجيلك علي المستشفى هشتغلها وهسافر القاهره علي طول "... يلا يا اسطي اطلع علي بيتك نجيب البنوته
# في ايه يا باشا نجيبها نوديها فين؟!
- منا قولتلك يسطي ربنا كريم قوي .. ربنا وقعك في دكتور تجميل حروق وشوش أطفال grin رمز تعبيري .. علشان يعوضك عن اخوك الزباله ..امسح دموعك و اعتبرني اخوك يسطي
# لا يا دكتور منا كشفت عليها امبارح في قسم الحروق وكتبولها علاج وقالولي مينفعش تتحجز علشان دي طفله ومحروقه وممكن تلقط عدوي
- متقلقش يسطي خالص سيبك منهم خالص دول مستواهم ضعيف .. ده تخصصي ومتعلمه في امريكا وانا مجهزلها غرفه معقمه في مستشفى تبارك علي اعلي مستوي وهيتابعها ممرض مخصوص وكل علاجها ببلاش
# بس الدكتور الكبير رئيس قسم الحروق قالنا امبارح ان لازم متخرجش من البيت علشان التلوث وانا بس محتاج اي حاجه من حضرتك اجيب العلاج
- بردو ربنا كريم قوي يسطي انا قلبي اتفتحلك خلاص احنا داخلين علي "تبارك" اهو .. هخلي الممرض ينزلنا بالعده والشاش والعلاج و هنيجي معاك نغيرلها علي الحرق في البيت
# مش عاوز اعطلك ياباشا وانا كمان من السنبلاوين
- يسطي سيبها لله لو في اسيوط هاجي معاك دي بنت بريئه ملهاش ذنب وبكره تبقي عروسه وهتعوز تتجوز
# انا بس باقيلي 50 جنيه علي تمن العلاج
- عيب يسطي سيب ال 150 جنيه ابقي هاتلها حاجه حلوه بيهم اما تخف وتبقي كويسه .. اركنلي هنا بس واستناني دقيقه هطلع احط الشنطه في المستشفى واجيب الممرض وعده الشغل وانزلك تاني علي طول..
خلص الموقف مع صوت العجل بيلف علي الارض وانا بحاول اجري وراه و اقوله استني خد الحساب يسطي .. طب اشرب شاي ومش هنوقعه علي وشك .. طب براحه لتخبط التاكس ده عليه اقساط grin رمز تعبيري
#تنصب_عليا_انا_تجرح_قلبي_انا
#تجميل_حروق_وش_اطفال_ومؤخرات_كبار
#النصاب_يأتيك_من_حيت_تترفع_ان_تتداخل_معه
عاجل 
الرئيسية 